प्रोजेक्ट सखी - दिन ४ (समापन समारोह): पाँचखाल नगरपालिका कार्यालय प्राङ्गण

अक्टोबर स्तन क्यान्सर सचेतना महिनाको सन्दर्भलाई आत्मसात् गर्दै, मोक्क्ष सामाजिक कल्याण तथा विकास प्रतिष्ठान नेपालको आयोजनामा सञ्चालित "प्रोजेक्ट सखी" अभियानको चौथो तथा अन्तिम दिन असोज २६ गते पाँचखाल नगरपालिका कार्यालय प्राङ्गण (वडा नं. ४, पाँचखाल) मा भव्यताका साथ सम्पन्न भयो। यस समापन कार्यक्रममा महिला स्वास्थ्य स्वयंसेविका (Mahila Samudayik Swastha Swayamsebika) हरूको विशेष उपस्थिति रहेको थियो भने ठूलो संख्यामा स्थानीय आमा तथा दिदीबहिनीहरूको उपस्थिति र उत्साहजनक सहभागिताले कार्यक्रमलाई अत्यन्तै सफल बनायो। शिल्पी कला समूहको मुक्तरङ्गमञ्चद्वारा प्रस्तुत "दृश्य धामिलो" सडक नाटक र फोरम थिएटर (Forum Theatre) को माध्यमबाट अन्तिम दिन पनि समाजका गम्भीर समस्याहरू मञ्चन गरिनुका साथै उपस्थित जनसमुदायसँग छलफल गरियो। यस चारदिने अभियानले पाँचखालका विभिन्न वडाहरूमा स्तन र गर्भाशय मुखको क्यान्सरविरुद्ध व्यापक जनचेतना जगाउँदै, प्रारम्भिक जाँचको महत्त्व बुझाउन र महिलाहरूलाई स्वास्थ्य चौकीको पहुँचसँग जोड्ने आफ्नो मुख्य लक्ष्य सफलतापूर्वक पूरा गर्दै यस वर्षको "प्रोजेक्ट सखी" अभियानको समापन गरेको छ।